新民黨今年以來動作多多，最近又喺港島南區海怡西補選勝出，主席葉劉淑儀心情靚，黨員都士氣一振，不過，政圈有傳，葉太一向錫男仔多過女仔，過往招攬女仔入黨或者出選，最後都冇咩好下場。但勝出海怡西補選嘅新任區議員陳家珮（Judy）就話，葉劉對佢好好，仲話政壇唔夠女議員，所以想培養多啲女仔入行喎！照佢咁講，葉劉錫仔又錫女喎！

設計圖片及對白

Judy尋日講到政壇路，一輪嘴大讚葉劉，話葉太係位好老師，教識佢好多嘢，即使葉劉反對青年黨員嘅意見，都會詳細解釋反對嘅原因，所以佢哋一班年輕人都好服葉劉咁話。

講到黨員性別，自從新民黨同公民力量結盟之後，一次過多咗五位女區議員，一改以前全男班嘅情況。葉劉要照顧咁多名女黨員，但聽聞該黨最近仲繼續同某區獨立女議員密斟，以招攬嗰位女將入黨，又繼續努力自己培訓，照咁發展落去，葉劉統領嘅女性議員分分鐘多過民建聯添！

第一手消息請下載on.cc東網iPhone/iPad/Android/Windows Phone Apps