政壇：建制派消極抵禦拉布戰
立法會今日開始就二○一四至一五年度預算案進行二讀辯論，拉布又成焦點，喺激進泛民加碼，溫和泛民反口之下，今年嘅修訂合共提出咗近二千項，幾乎係上年嘅兩倍，打破晒立法會歷年來紀錄。據聞唔少建制派未開戰已經舉手投降，表明唔會再虛耗光陰，同班泛民「日以繼夜、夜以繼日」開會，寧願任由會議流會逼立法會主席「剪布」，拉布戰隨時淪為流會戰。
等主席頂唔順剪布
前晚凌晨限期後，秘書處初步統計指共收到一千九百一十七項修訂，當中淨係社民連「長毛」梁國雄一個人，就獨力入咗一千五百零三項修訂，佔約八成。人民力量陳偉業、陳志全、獨立泛民黃毓民及新同盟范國威亦分別入咗十幾至百幾項修訂。之前講過今份預算案唔值得要拉布嘅溫和泛民三大黨，即民主黨、公民黨同工黨，最後亦反口入咗數項至十數項修訂，要求削減不同高官及部門嘅預算開支。
剪布機制未能喺今場拉布戰出籠，有建制派議員就話，佢哋表面上都會排下期、編下更，作狀輪流留守會議廳迎戰泛民拉布，但私底下其實有唔少建制派都認為，根本就唔應該再陪泛民一齊癲，不如放軟手腳，撐到就撐，撐唔到就由得佢流會算數，相信立法會主席最終都會以「政府有財政危機」為由剪布。政府就好驚條布拉唔斷，今日開始將派出大批高官「狗仔隊」，長駐立法會各大小出口監察議員行蹤，以免流會、進而出現財政危機。
