政壇：施俊輝度蜜月唔去馬國
馬來西亞近排發生好多唔開心嘅事件，包括沙巴綁架案同埋馬航失蹤，確係嚇怕唔少遊客。嚟緊就到復活節，好多人都會計劃去旅行，有人話會改搭其他航空公司嘅航班，有人就更直頭唔敢去馬來西亞一帶添！啱啱喺去年底結婚嘅教育局政治助理施俊輝（Jeff）一樣怕怕。Jeff話，佢同太太Karen仲未去度蜜月，打算暑假度蜜月都唔諗去沙巴或馬來西亞，寧願去遠啲，反正仲有其他地方可以選擇。
施俊輝（左）同太太Karen打算暑假補度蜜月，但就唔會去馬來西亞。
捨近圖遠去歐洲
Jeff同太太工作都好繁忙，過咗咁耐都仲未抽到時間去補度蜜月。雖然嚟緊復活節有長假期，不過Jeff就話仲未攞假，睇怕要到暑假先可以去旅行。暑假期間陽光與海灘就最受歡迎，不過近日咁多事發生，佢哋唔單止唔會搭馬航，仲連馬來西亞嗰邊都唔敢去，寧願去遠啲好似歐洲咁，佢哋仲計劃同埋兩邊家人一齊去，人多熱鬧啲好玩喎！
