政壇：綠色藝術品感動馮婉眉
廢物都可以變藝術雕塑。滙豐銀行同薩凡納藝術設計（香港）學院（ SCAD（HK））合作，將廢物變為藝術品，並舉辦「Waste to Art」綠色藝術展覽，呢批廢物變身嘅雕塑喺滙豐位於中環、奧運同將軍澳辦公大樓展出，滙豐香港區總裁馮婉眉（Anita）尋日先睹為快，佢大讚學生嘅創意同熱誠，仲話雕塑可以提高員工嘅環保意識！
馮婉眉（右）先睹為快，參觀學生作品。
廢料變身雕塑
呢班薩凡納香港嘅學生創意十足，利用滙豐日常營運中產生嘅廢料，其中包括塑膠、紙張、電器同電子廢料，創造出二十三件藝術雕塑，並宣傳關注環保嘅訊息，展覽活動吸引環境局副局長陸恭蕙出席。
除咗呢個展覽外，滙豐又推出「環保足跡計劃」，第一季度活動嘅主題係水資源，今次係廢物，未來兩季仲會有能源同紙張，愛環保、鬥心思，吸引力梗係再加分。
