政壇：陳維安有計抗擊佔立會
自從台灣發生佔領立法院嘅學運之後，唔少人關注本港立法會會唔會面對類似情況。立法會行政管理委員會尋日就召開閉門會議，審視及商討有關應變措施。結論係唔使怕，若有需要立法會隨時可以下逐客令，限制向公眾人士開放。一旦真係被「佔領」，班議員隨時可以去第二度開會，連境外都得喎！嘩，呢招移動立法會真係絕，秘書長陳維安定過抬油喇。
設計圖片及對白
經過會議後，主席曾鈺成話，經檢視立法會設施嘅使用情況同埋保安措施，相信喺正常情況下，現有安排已經足夠。但如果面對「特殊情況」，會議就決定授權秘書長喺徵詢行管會意見後，就可以限制向公眾人士開放。咁乜嘢係「特殊情況」呢？曾鈺成只係話，去年討論係咪用特權法調查港視風波時，曾有大批市民聚集，都唔使採取特別措施，相信大家可以憑常理去諗諗。
或尋求警方協助
講起立法會面對群眾示威嘅惡劣情況，要數四年前嘅反對興建高鐵風波。當時立法會被重重包圍，高官及議員出入寸步難行，但係立會都只係同警方成立聯合指揮中心，由秘書長負責及主導保安工作。去年預算案拉布期間發生「玩升降機」事件，立法會亦搵過警方協助，所以曾鈺成都話，若果立會自己處理唔到，屆時或會尋求警方協助。
有人關注如果立法會真係被佔領點算？曾鈺成就話，一旦會議廳無法使用，法律上係可以搵任何合適地點開會，唔會影響立法嘅法律效力。咁又係，當年臨時立法會都係喺深圳開會，只係有人入稟法院質疑臨立會是否合憲。
