龕位亂象不解決 高官小心自作孽
提起迫遷，大家通常會諗起內地，因為中國特色拆遷已經成為天怒人怨嘅代名詞，多少蟻民被強徵土地，多少百姓被強拆住房，搞到怨氣沖天，處處怒火。諗唔到嘅係，今日香港人一樣要面臨迫遷厄運，分別只係被大拆特拆嘅唔係陽宅，而係陰宅，流離失所嘅唔係生人，而係先人。
由於公營骨灰龕位長期嚴重短缺，私營骨灰龕場近年好似雨後春筍，不斷進駐工廈住宅、廟宇同鄉郊，搞到亂象叢生，民怨載道。千呼萬喚之下，食衞局局長高永文日前終於表示，將於本季內引入規管私營骨灰龕法例，期望可盡快取締唔太可能符合要求嘅樓上骨灰龕，至於可以採取措施補救嘅龕場，就會畀時間改善咁話。
唉，私營骨灰龕問題講咗冇十年都有八年喇，政府依家至話立法規管，仲有冇遲啲呀？當然啦，遲到總好過冇到，當局終於肯出手撥亂反正，點都好過翹埋雙手乜都唔做，問題係，港府施政特色從來係虎頭蛇尾，雷大雨小，如果日後唔能夠做到有法必執，執法必嚴，違法必究，有法都等如無法嘅咋。
仲有吖，淨係加強規管係唔夠o架，最重要始終係增加公營龕位供應。大家不妨諗吓，不符要求嘅私營龕場沒錯要取締，不過大量清拆違規陰宅，意味住將會有唔少先人被迫遷，如果公營龕位繼續嚴重短缺，咁被迫遷出嘅骨灰點算呀，唔通露宿街頭呀？大吉利是咩！
所以話，當局對骨灰龕問題處理失職，真係玩死人o架。如果唔係公營龕位長期嚴重不足，違規私營龕場就唔會有機可乘，開到成行成市；如果唔係當局對私營龕場闊佬懶理冇監冇管，搞到亂象叢生尾大不掉，市民先人亦唔會面臨迫遷，承受流離失所死不安息嘅痛苦。係人都知，私營龕場一直良莠不齊，泥沙俱下，尤其係部分將陽宅當陰宅，樓下住人，樓上住靈，搞到環境衞生惡化，居民不勝其擾，當局拖到家陣至嚟補鑊，簡直靠害。
咪話太一叮睇死當局，如果公營龕位繼續供不應求，取締違規私營龕場隨時又係爛尾收場嘅咋。有數得計，骨灰龕位需求每年大約四萬個，但現時八個公營龕場嘅龕位每年只有三百個可以重用，其他早已全部配售，喺龕位嚴重缺貨之下，港府最終究竟會唔會鐵腕整肅違規私營龕位，實在不得不令人懷疑。
點講都好啦，生有住，死有葬，係政府應有之責，港產官僚唔該快快補番骨灰龕問題隻鑊，如果唔係，小心飽受迫遷之苦嘅遊魂野鬼搵你哋算帳吖，叮！
