一向唱好中國經濟嘅德意志銀行大中華區首席經濟學家馬駿，早排傳出加入人民銀行，其後都冇乜動靜，最近佢自揭底牌，承認過檔，尋日仲向客戶發出名為《離開德銀 加入央行》嘅告別信，親口承認會離開工作咗十三年嘅德銀，由下個禮拜開始，擔任人行研究局首席經濟學家職務，成為人行近年少數嘅外聘人員之一。

馬駿話返新工之後，會更加着重對中國宏觀經濟同金融改革有影響嘅中長期事件。（資料圖片）

馬駿令外界印象最深刻嘅，係佢一向唱好中國經濟，雖然德銀上個月都下調咗對今年中國GDP嘅增長預測，但係百分之七點八嘅預測值仍然高過好多外資大行。佢同時都係人民幣國際化嘅積極倡導者，早兩年參與撰寫《人民幣走出國門之路》，建議香港發揮離岸人民幣市場嘅「批發」功能，成為離岸人民幣嘅流動聚集地、融資中心、定價中心同財富管理中心。

馬駿喺告別信入面話，將會喺新崗位上盡全力工作，以後會少啲關注市場嘅短期波動情況，更加着重對中國宏觀經濟同金融改革有影響嘅中長期事件。喺任職德銀前，馬駿都曾經喺世界銀行同國際貨幣基金組織（IMF）做過高級經濟學家，佢喺國際性機構嘅經驗，會為人行將來嘅政策研究工作帶來咩影響，就要大家拭目以待喇！

第一手消息請下載on.cc東網iPhone/iPad/Android/Windows Phone Apps