城中鏡：郭位帶隊赴韓跑馬拉松
唔少人每年三、四月都會到韓國賞櫻花，香港城市大學校長郭位幾日前都去咗一轉韓國，不過佢唔係去賞花，而係帶隊出戰「二○一四年慶州櫻花馬拉松賽」，佢親自落場跑十公里賽，仲攞咗面「金牌」添！唔好以為校長真係咁跑得，原來只要完成賽事嘅選手都可獲贈一面金牌以示鼓勵。其實，郭位年紀都唔輕，成功跑晒全程已經算係咁。
城大校長郭位（前左二）帶隊參加櫻花馬拉松賽，完成十公里賽事。（受訪者提供）
今次同郭位一齊去跑嘅仲有城大過百名師生及校友，有兩名學生跑得唔錯，攞到女子組十公里賽第五同第六名。郭位前年先帶隊返台灣「老家」參加台北馬拉松賽，今年就組隊到海外參賽。據講比賽嗰日天朗氣清，郭位跑步之餘都不忘賞花，可能佢平時忙於公務好少練跑，有同場比賽嘅城大參賽選手爆料話，當日郭位都跑得幾吃力，好彩有幾位運動健將齊齊傍住佢，名次就唔好提喇！不過，總算完成賽事，都算唔失禮喇！
