城中鏡：孫大倫鍾志平終身做學神

香港管理專業協會早前舉辦周年晚會，城中大老闆都去撐場，當中包括身兼協會主席嘅中港照相器材集團主席Dennis孫大倫、「電鑽大王」香港工業總會前主席Roy鍾志平同大家樂集團主席陳裕光。做人最緊要終身學習，Dennis同阿Roy雖已退居幕後，但都不忘學新嘢，確保唔同時代脫節。

鍾志平近期迷上睇宗教與歷史書。

孫大倫（左）同陳裕光鼓勵老闆們多進修，與時並進。

黃傑龍（左）同太興飲食集團主席陳永安齊現身。

鑽研養生食療

鍾意影相嘅Dennis近期迷上自製電子相簿，得閒就將珍藏相集左砌右砌。但講到開相展，佢就話怕醜唔會嘞。除咗影相，佢又興起鑽研養生食療，話每餐進食四成肉類蛋白、三成蔬菜、一成粉麵類，再加一隻雞蛋同少量海鮮，保證營養夠晒均衡，健康又唔肥喎！

阿Roy都唔執輸，雖已擁有四個博士學位，但最近又迷上研究宗教同歷史。點解會揀宗教及歷史書呢？佢就話鑑古知今，無論係提升管理質素，或者對做人處世嘅助益都好大。

講起管理心得，Dennis話最忌急進，要畀員工適應期，好似佢二十年前曾引入外國優質管理概念，思想夠晒前衞，但員工不太受落。直至幾年前再大力推行，終於水到渠成。所以話，改革要循序漸進，做老闆亦要不斷升級。

叙福樓集團執董黃傑龍亦有到場，佢推崇企業要有人情味，舊年十月集團發起派代用飯，各界回響熱烈，今年四月中起，善心人士只要上網就可以畀錢捐出代用飯，齊為有需要人士送暖。