政壇：搞搞政：傳爭任主席倒灶 羅康瑞敗走機管局

空降貿發局惹反彈

據悉最近當局正式敲定由即將卸任貿易發展局主席嘅蘇澤光接任明年五月任期屆滿嘅張建東出任機管局主席，至於羅康瑞就會空降到貿發局做主席，但聽聞貿發局內部已現反彈，分分鐘掀起一場人事大地震。

消息指當局睇中蘇澤光做機管局主席，一來係佢政務官出身，擁有豐富嘅商界同管理大型機構經驗，有足夠政治手腕去帶領機管局迎接未來多個挑戰，包括因興建機場第三條跑道，或引發同環保團體新一輪角力等。

至於羅康瑞由機管局主席大熱人選變落荒而逃，消息指底因係羅康瑞同機管局管理層不咬弦，早前由於佢喺機場北土地用途問題上獨排眾議，與機管局董事局爆發爭拗，令內部不和公開化，因此有關方面決定剔除羅康瑞於考慮名單之列。

最新消息話，羅康瑞嘅下一站係貿發局主席。但話雖如此，佢嘅未來走勢仍充滿變數，亦唔一定會順風順水，事關貿發局主席一職向來工商界中人都爭崩頭想做，有傳多名工商界人士都對呢個位虎視眈眈。再者，羅康瑞較難同人合作，聽聞貿發局咁啱有高層即將約滿離職，羅康瑞喺局中嘅評價一般，分分鐘觸發新一輪逃亡潮。所以一句到尾，羅康瑞咪以為跌咗個橙執番個桔，稍一不慎，又會踏入另一個泥潭。