政壇：人力棄南豐補選有內情
早前都講過，港島東區區議會南豐選區因白鴿黨區議員梁淑楨嚴重中風，出現議席空缺，需於下月舉行補選。繼建仔同白鴿黨派員報名參選之後，人民力量本來都打算喺呢區爭一席位，但佢哋尋日開會決定放棄競逐議席，聲稱因為要集中宣傳公民提名同「佔領中環」行動，而且梁淑楨因中風而落台，咁樣搶人哋個位不合道義喎！咦？一向以狙擊白鴿黨為樂嘅人力，又會突然變得咁有慈悲心嘅？
袁彌明早前喺海怡補選失利，估計唔會披甲再戰南豐補選。（資料圖片）
袁彌明「劉嗡」難出戰
八卦友話畀我哋知，實情係因為人選方面出現咗問題。有傳人選之一係人力主席袁彌明，但係佢啱啱先出戰南區海怡補選失利，冇理由早兩星期先心繫海怡，轉個頭就心繫南豐o架。至於另一人選係該黨前主席「劉嗡」劉嘉鴻，但黨內評估劉嗡冇乜號召力，擔心最後會輸得唔好睇，所以焗住放棄今次嘅機會囉！
南豐選區補選將於本周四截止提名，並於下月十八日進行投票，預料到時好大機會係場單對單嘅選戰，由東區區議會主席黃建彬嘅助理李清霞大戰梁淑楨嘅助理張國昌。
