喺眾多立法會新丁中，建築、測量及都市規劃界議員Tony謝偉銓至今仍保持「單身」，未肯加入任何政黨或其他政治聯盟。佢話其實喺過去兩年新民黨同經民聯都試過向佢招手，但業界希望佢保持獨立多啲，所以惟有請兩個黨食檸檬。

謝偉銓話喺今屆任期內都唔會加入任何政黨。

Tony話唔入黨有兩個原因，第一係需要多啲時間尋覓理念相同嘅政黨，第二係自己競選時無政黨背景，如果貿貿然加入某一政黨，選民可能會唔太高興，所以今屆任期都唔打算加入政黨。

不過，唔入政黨唔代表唔做嘢，稍後佢會就雙倍印花稅提出「處男修訂」，建議延長市民「樓換樓花」嘅退稅期限，即如果市民買第二層樓係樓花時，只要在收樓後半年再賣出第一層樓，就可獲退回雙倍印花稅。佢第一次做修訂就係地產議題，唔怕被人話佢偏幫發展商咩？佢承認建議有可能推高樓價，但就拍晒心口強調個建議係自己諗出嚟，從冇同任何發展商商量過喎！

第一手消息請下載on.cc東網iPhone/iPad/Android/Windows Phone Apps