政壇：環局政助慳水稱后
眾所周知，環境局局長「星星」黃錦星超級慳電，平均每日只用一點五度電，連天文台前台長「黑英」林超英都甘拜下風。唔講唔知，原來環境局政治助理Michelle區詠芷都好慳家，尋日仲自爆兩年都未交過水費，連水費單都冇收過。舊年佢獲委任政助，驚漏交水費招人話柄，於是上任前打電話去水務署追問，先知原來兩年嚟累計水費都唔過十蚊，所以連水費單都冇喎！
相信大家都好想知Michelle究竟點過日子o架？係咪唔煮飯、唔喺屋企沖涼先？佢就話每晚都會煮飯，屋企一早裝咗慳水水龍頭，同樣嘅水壓可以唔使用咁多水。仲有每次用水最少要用三輪先會倒，好似洗米水會留番嚟洗菜，再用嚟洗碗。但係最緊要係用水習慣，例如刷牙唔好水長開，每次開水龍頭都會校細個出水位。
抽濕機變製水機
佢仲教路，話抽濕機都係慳水妙方，遇着近期天氣咁潮濕，一晚已經抽到成二十、三十公升水！佢話只要勤洗隔塵網，抽濕機啲水都可以用嚟飲，但係佢過唔到心理關口，所以只會用嚟洗碗同淋花。聽佢講到停唔到口，仲識得將抽濕機變成製水機，封佢做「慳水女王」也不為過。
講起慳電，Michelle直認學唔到星星咁夏天唔開冷氣，因為屋企位「大隻佬」老公好怕熱，如果唔開冷氣就瞓唔着。即使係咁，佢話到依家都未用晒政府提供嘅電費補貼。佢仲話環境保護署好多員工都係慳電專家，佢哋唔會開房燈，淨係開枱燈。但係辦公室唔夠光做嘢會壞眼o架喎，唔怪之得咁多環保署職員都戴眼鏡喇！
