賤價租地又倒貼 官僚愚蠢無藥醫
有一個大地主，屋企人多冇地方住，佢唔係將地用嚟起屋，反而賤價出租畀有錢闊佬做私人會所，點不知租客極度賴皮，搞爛間屋連維修費都要地主出埋。呢個蠢到冇藥醫嘅地主係邊個吖？咪就係港府囉。
香港地少人多，寸土尺金，現時全港有七十多個私人會所嘅土地都係政府批出，不少地皮價值都係億億聲，租金得幾多？講出嚟都冇人信，一年一千蚊港紙咁大把。港府敗家浪費資源不特止，租出土地後又闊佬懶理，卒之搞到違規亂象百出，連危險斜坡維修費都要由港府支付，出完雞又出豉油，問你點頂。
唔係太一叮亂講o架。嗱，其中一幅估值五十億元嘅靚地，位於渣甸山祈禮士道二號，佔地約十三萬平方呎，包括一幅斜坡。屋宇署九九年發現斜坡有危險，向會所發出修葺令，限定時間聘請專業人士修葺並提交補救方案，點知對方睬你都傻，拖足十五年都無動靜，仲賴皮到話要將斜坡交還畀政府添，最終由政府拎出六百萬元修葺，條數到家陣都未收得番，呢啲都係納稅人血汗錢嚟o架。
另一幅土地位於荃灣川龍，屋宇署○八年發出修葺令，指槍會所在地兩幅斜坡有危險，對方又係藉口多多，又係死拖爛拖，遲遲唔肯動工。雖然最終被檢控，定罪又罰款，但工程搞到依家都未完成，唔知點收科。
即係咁，將土地批畀私人會所係港英時代產物，嗰時人口冇咁多，土地資源冇咁短缺，爭議亦冇咁大。家陣唔同嘞，多少無殼蝸牛望樓興嘆，房屋問題成為港府施政「重中之重」，點解唔將土地收番，改建房屋呢？當局一方面為「地從何來」發愁，又要填海造地，又要見縫插針，又要寸土必爭，仲要打郊野公園主意，十足「盲搶地」咁款，另一方面卻嫌貧愛富，製造「土地面前人人不平等」，仲要向權貴倒貼，你話唔係官商勾結都冇人信啦，吓話！
好似渣甸山個私人會所咁吖，完全係為富豪度身訂造，會議室、網球場、泳池、籃球場、中菜廳及酒窖等設施一應俱全，但現場所見，設施非常殘舊，使用率有幾多不問可知，同生人霸死地根本冇乜分別。講真，有錢人本身有大把土地，亦有大把娛樂，港府與其錦上添花，不如為無殼蝸牛雪中送炭好過嘞。
一句講晒，與其「盲搶地」，不如收回私人會所土地。正如京官話齋，土地及房屋問題不僅係經濟及民生問題，更加係政治問題，港府繼續包庇權貴會所，盞引起民憤嘅咋。叮！
