城中鏡：高永文做獸醫都掂
好多人都鍾意養寵物，食物及衞生局局長高永文同埋副局長Sophia陳肇始尋日出席活動時，都不約而同講起呢個話題。
高永文唔止受師奶歡迎，連狗仔都氹得掂。
陳肇始攞起鬆獅蜥蜴，面無懼色。
話說高永文出席活動時，原本病到冇喱神氣，但係見到狗仔就精神為之一振，用雙手不停按摩狗仔面珠。但見狗仔流露出好享受嘅神情，冇耐就舒服到瞇埋雙眼瞓着咗。
陳肇始攞蜥蜴唔驚
高永文好得戚話自己以前養過貓，所以好熟動物脾性。咁如果佢當初唔揀做骨醫，而做獸醫咪一樣好掂？高醫生唔客氣話：「可能都OK o架！」
另一邊廂，Sophia出席兩棲及爬蟲協會活動時，即場攞起鬆獅蜥蜴，一啲都唔怕，睇嚟都係養過寵物之人。佢話曾經養過狗，狗對主人好忠心，好似佢返屋企時，狗仔會即刻撲埋嚟，又會同佢傾偈，十足十人一樣，氹到主人好開心。兩年前屋企隻西施狗過咗身，佢想養番一隻，但到依家都仲未搵到啱眼緣嘅狗喎！
同場嘅立法會議員陳克勤一嚟到就捧起全場最大、重四十磅嘅九歲蘇卡達象龜，克勤仔早排喺立法會係咁追問康文署全港公園有幾多隻龜，夠晒騎呢。佢解畫話，好多人鍾意將烏龜放生喺公園或者私人屋苑水池，其實係好心做壞事，因為好多烏龜習慣被人飼養，放生後反而唔適應，幾隻龜放埋一齊仲弊，隨時會自相殘殺，或者明明係淡水龜但就放咗落鹹水，總之放生等於放死，所以想喚起大家關注喎！
