話時話，立法會商界（一）代表Jeffrey林健鋒同工業界（一）Andrew梁君彥，不經不覺已做緊第三屆議員，到二○一六年就足足做咗十二年，據聞唔少人都對兩人議席虎視眈眈，認為兩人任期都夠晒鐘。正所謂「長江後浪推前浪」，唔知佢哋能否說服「長江」嘅後浪唔好推得咁快呢？

設計圖片及對白

Andrew同Jeffrey呢對商界孖寶，當年係富貴黨出身，○四年齊齊進身功能組別，到○八年退出富貴黨另起爐灶。兩人由政壇新丁，搖身一變就成為商界重要代表。Andrew貴為立法會內務委員會主席，Jeffrey更身兼行政會議成員，但正正喺呢個時候，就有人要求二人退位讓賢。

郭振華傳欲挑戰

先講Andrew喺工業界嘅議席，有傳現任工業總會副主席郭振華有意一試，支持佢嘅人認為郭振華喺工業總會貢獻良多，又係深水埗區議會主席，理應有力問鼎。不過，有工業總會高層認為Andrew咁多年都做得唔錯，除非總會內部出現反對聲音，否則未必急於換人。香港總商會嘅Jeffrey亦面對挑戰，總商會現時內部以外資商會為主，一直有傳聞指，中央有意培育紅色商家出任總商會立法會議員，而總商會理事余鵬春就係其中一位盛傳人選。到底最終邊個拗贏手瓜？睇怕有排未揭盅。

睇番歷史，林、梁二人嘅前任如田北俊同丁午壽，都係只做咗兩屆功能組別議員，林梁孖寶依家做緊第三屆議員，能唔能夠繼續打破紀錄，就要靠自己造化喇！

第一手消息請下載on.cc東網iPhone/iPad/Android/Windows Phone Apps