泛民主派喺中環滙豐總行展開嘅絕食行動已進入第十一日，絕食者只剩低白鴿黨立法會議員胡志偉、尹兆堅、工黨林祖明同郭紹傑四人。「驅蝗行動」召集人梁金成（網名金金大師）原本計劃尋晚拉大隊去滙豐搞「打邊爐爭普選」行動，實行用「雞蛋滾豬腸」對抗泛民嘅「雞蛋抗高牆」。不過，喺活動開始前，金金大師突然褪軚取消計劃，驚落雨整熄個爐喎！

泛民主派嚴陣以待網民來挑機，點知對方臨時取消活動。

金金大師解釋，原本佢哋已準備好打邊爐用具，諗住按原定計劃去「挑機」，點知人算不如天算，尋日一直落雨無停過，加上愈嚟愈大風，佢哋擔心喺天雨下打邊爐會出現危險，於是決定忍痛取消今次行動。

林卓廷寸臨陣退縮

聽到金金大師決定唔嚟打邊爐，白鴿黨總幹事「阿廷」林卓廷即時喺社交網站寸爆對方臨陣退縮，又恥笑佢哋落雨就唔爭普選，簡直係無膽匪類。為咗鼓勵對方一齊去滙豐爭取普選，阿廷甚至話，大會可以借帳篷畀佢哋打邊爐，又話改今晚去踩場都冇問題，佢哋一定會在場恭候喎！

第一手消息請下載on.cc東網iPhone/iPad/Android/Windows Phone Apps