政治係妥協嘅藝術，但識欣賞呢份藝術情操嘅政界中人，似乎買少見少，好彩香港仲有啲政壇老前輩幫手指點迷津。前立法局主席、中大政治與行政學系名譽教授黃宏發，早前有份聯同十幾位大專學者提出二○一七年特首普選方案，建議喺提名程序展開前引入「公民推薦」為法定程序，之後再取得提名委員會內八分一提名就正式「出閘」，點知被人鬧妥協，搞到發叔鬼咁勞氣。
發叔有份倡議呢個方案，當然好着緊啦！發叔尋日話，政治係可行嘅藝術，政治不是一拍兩散，爭取唔成功，一係放棄，二係搞革命，依家學者們想一條路出嚟，但大家唔願意傾談，攞住自己嘅立場死命話「你妥協、你妥協」。發叔認為依家最緊要係喺全國人大常委會未就政改釋法前，各人提出自己意見，否則釋法後就好難再商討。
現處半退休狀態嘅發叔，其實都已經去到無欲無求嘅階段，亦唔需要追逐名利，佢咁苦口婆心勸泛民、建制唔好企硬，自己又拋出建議，都係想搵條出路畀香港人行，等大家見到二○一七年有真普選。
但如果建制泛民唔領情，繼續自說自話，發叔呢個中間人就真係白做嘞！
第一手消息請下載on.cc東網
