政壇：劉燕卿大玩「三個字」金句
相信大家仲記得馮煒光喺未加入政府之前，有傳媒問佢係咪會出任新聞統籌專員一職，當時佢回應話：「三個字，不予置評」，自此「三個字」嘅金句，令佢成為全城笑柄，而佢喺政界嘅舊雨新知就呢「三個字」玩到不亦樂乎，寸爆佢。
設計圖片及對白
勢估唔到，一向精明嘅新任申訴專員Connie劉燕卿，唔知係咪耳濡目染，又或者對呢「三個字」印象太深刻，佢尋日接受電台訪問時，被問到佢咁多年來都無喺政府工作過，可唔可以勝任申訴專員一職時，竟然口快快咁話：「可以講，三個字，我無包袱。」咦！我無包袱明明係四個字喎。唔通Connie都寸緊馮煒光老貓燒鬚？咁就真係佢自己先至知嘞！
主動幫部門機構體檢
查實Connie係想話，正正因為佢冇喺政府工作，唔會對一啲問題有「積非成是」嘅想法，就算調查時遇到相熟嘅部門首長，都一樣冇情講。曾經喺消費者委員會工作咗三十八年嘅Connie形容，消委會同申訴專員公署嘅工作都係處理市民投訴，只係申訴專員涉及嘅範圍較大，涵蓋各個政府部門同二十四個公共機構，較有挑戰性，而消委會嘅核心價值係公平公開公正，佢會繼續以呢個信念擔任申訴專員。
佢又話公署每年有約五至六項主動調查，可以補足未有市民投訴但又涉及重大公眾利益嘅課題，佢會繼續主動出擊，等問題「未爆煲」前就同部門機構「免費體檢」，睇吓內部有無運作問題，而唔係要「人頭落地」。公署過去幾年收到嘅投訴略有增加，過去一年就有五千五百幾宗投訴同一萬二千幾項諮詢，佢話唔排除未來需要更多人手。
