SUN奇古怪：SUN潮語：【香港化】
「香港化」呢個潮語，係隨住反服貿行動而起。「香港化」係台灣潮語，意思好明顯係指害怕台灣社會會變成香港一樣，經濟命脈全盤依賴中國大陸，本土獨有文化被大陸嘅錢同人摧毀。作為香港人，聽到「香港化」原來係咁嘅意思，真係不禁悲從中來。
台灣反服貿學生運動，不經不覺成個月。學生到今日依然佔領住台灣嘅立法院，而馬英九總統亦冇迹象會讓步。睇嚟呢單嘢真係唔知會搞到幾時。早排，有一批支持服貿嘅民眾，同反服貿嘅學生打對台，佢哋人數不多，睇佢哋外貌都係一啲上咗年紀嘅阿公阿婆，佢哋高舉住愛台灣嘅標語，感覺上同香港有班撐政府嘅人好相似，又係打着愛嘅旗號上街。不過，台灣就冇淨心BB。同時，香港亦都冇好似陳為廷同林飛帆咁靚仔嘅學運領袖，更遑論好似台灣人咁勇武，衝入立法會。香港嗰班所謂民主派，淨係識扮絕食爭普選，仲懶悲情博同情呃Like。有冇效果？你睇佢哋扮絕食咗十幾日，政府官員有冇回應過？好心佢哋慳番啲力，返屋企靜思己過好過。香港今時今日咁嘅環境，膠到舉世聞名，完全落實咗膠度自治，看在台灣人眼裏，都唔怪得佢哋驚實行咗服貿之後，台灣會慢慢「香港化」！
以前香港係代表繁榮、自由、文明、進步、法治、守規則……全部都係好嘢。三十年前鄧小平就係將深圳呢個小城市「香港化」，結果深圳由一條農村，變成全國數一數二嘅大都市，後來更拓展到全國，成為今日嘅中國經濟奇迹。但估唔到，香港自從主權移交，再加上CEPA同個人遊之後，香港已不再香、「香港化」變成神憎鬼厭嘅貶義詞，真係不免叫人有種「雕欄玉砌應猶在，只是朱顏改」嘅唏噓！
「香港化」呢個潮語，希望就真係會止於一時，未來「香港化」，也許會成為歷史。
