政壇：絕食冷淡泛民玩「放氣」球
泛民主派絕食爭普選行動尋日踏入第八日，十七人絕食團尋日走剩四個，當中包括白鴿黨胡志偉，尋日該黨無端端「放氣」球，嘩，寄語絕食人士及早放棄？堅守者話唔係，不過，放氣球現場搵極都唔見泛民重要盟友、公民黨嘅身影，氣球顏色更係橙、綠分明，兩色分別代表工黨同白鴿黨，泛民所謂「團結爭普選」恐怕只係大隻「講」居多。
佢哋尋日放咗一百九十二個氣球，寓意四人絕食一百九十二小時，將真普選訴求傳遍香港喎。絕食團苦撐至今近二百小時，可惜傳媒曝光率低、市民回響亦唔大，問到仍然死守嘅人士覺唔覺得絕食行動「嘥氣」？
佢哋就死撐話行動「非常成功」喎，仲透露正籌備下月發起第二波絕食，會另覓人選重新組團絕食咁話。今次絕食搞成咁，下次有幾多人落疊，真係好難講嘞。
