進身官場後，發展局局長陳茂波就頭頭碰着黑，最近雖然少咗是非，但政策方面又有難，事關港人港地被傳已經冇咗、又有人考佢幾時應該買樓？尋日陳茂波出席一個電台節目，講到港人港地，佢用字遣詞好小心，強調並唔係取消，只係「冇咁迫切」推行；至於依家係咪時機買樓，佢更謹慎：「政府冇叫人去買樓」！寧願做個瞻前顧後嘅冇膽高官，好過一失言成千古恨！

設計圖片

陳茂波喺個電台節目中為樓市及土地政策解畫，港人港地究竟點呢？佢日前先喺立法會斷然否認呢個計劃已經壽終正寢，仲因此同激進議員舌戰一番，尋日再講，佢就先講樓市大環境，話自從雙辣招推出後，樓市交投情況有變，非港人購買本港物業嘅比例降至百分之二，顯示現時再推出港人港地嘅迫切性不高。不過，陳茂波都話，咁唔代表政府未來三年，一定唔會再推港人港地。

佢堅持否認取消港人港地，都係唔想重蹈首屆政府靜雞雞取消八萬五政策覆轍，當年樓市急調，好多市民將怨氣轉去八萬五政策，其中一個攻擊點就係政府處事鬼祟，取消八萬五政策竟然用「唔講就冇咗」呢一招。咁多年嚟，呢件事深入民心，所以陳茂波打死都唔認。

驚人鬧 要慎言

同樣嘅情況仲出現喺應唔應該買樓問題上，有聽眾致電，話無能力買樓，亦有人向佢反映樓市政策唔清晰，令人唔知幾時應該買樓，陳茂波就話：「買樓係市民自己嘅決定，政府無叫人去買樓，政府會確保市場透明度，向市民提供資訊。」答咗等於冇答，記得當年亞洲金融風暴時，有前高官嗌人買樓，後尾一街負資產時，該高官就畀人鬧到暈，所以為官要慎言，陳茂波算唔算見過鬼怕黑呢？

第一手消息請下載on.cc東網iPhone/iPad/Android/Windows Phone Apps