「清明時節雨紛紛,路上行人欲斷魂。」今日係清明節,唔少孝子賢孫嘅心情特別傷感及沉重,有人為懷念先人而傷感,有人就為先人安息無所而沉重。其實咁都好易理解嘅,本港骨灰龕位長期不足,對住一班無能官僚,唔沉重就有鬼喇!

嗱,立法會特別財委會尋日討論環境衞生問題,骨灰龕問題又被擺上枱。喺議員窮追猛打之下,食衞局局長高永文話喎,政府正研究未來十年大量增加骨灰龕位供應,而今年初亦已開始放寬政策,畀有密切關係但非近親人士共用龕位,例如同居人士咁。至於私營骨灰龕亂象,佢就話預計今年第二季向立法會提交規管草案喎。

唔係啩?咁就算交咗差,真係唔怕失禮死人咩。今屆政府一上場就話要解決骨灰龕短缺問題,點知左度右度,只係度出一招「龕位共產制」,講出嚟都笑死人喇。唔怪得新招變廢招,龕位共產制實施至今只得兩宗申請獲批,純粹得啖笑。講句唔好聽,龕位嚴重缺貨,就算點樣撈亂骨頭都解決唔到問題喇。

所以話,香港人真係可悲,生無立錐之地,死無安息之所。好多人在生之時已經飽嘗蝸居之苦,無數家庭好似沙甸魚咁逼埋喺劏房裏面,估唔到死後都無法解脫,同樣要一家幾口逼埋一個龕位,真係情何以堪。

講到呢度,太一叮真係有啲懷疑,港產官僚係咪特登同市民過唔去,龕位短缺問題大大話話存在十幾廿年喇,點解搞極都搞唔掂呢?前朝食衞局局長周一嶽就話出名無能啫,唔通現任嘅高永文又係一樣咁窩囊?依家又唔係叫你哋上太空探月球,只係增加龕位供應,咁簡單嘅問題居然由前朝拖到今屆政府,仲話要再等十年至可大量供應,都唔知好笑定好嬲。

話到尾,骨灰龕短缺問題遲遲未能解決,除咗因為官僚無能,亦因為當局敷衍塞責。大家應該記得,前朝政府曾經實牙實齒講過要喺十八區建骨灰龕場,點知講完就算,到依家仲係無影無蹤,難怪有立法會議員質疑,所謂嘅十八區建龕政策,根本係發晦氣。冇錯嘞,骨灰龕問題千瘡百孔,公營龕位長期缺貨令人難頂,私營龕位亂象叢生更加匪夷所思,十八區建骨灰龕場固然係發晦氣,當局拖到第二季至向立法會提交規管私營龕場草案,咪一樣不知所謂!

唔好話太一叮唔提醒吖,周一鑊對骨灰龕問題闊佬懶理,唔嗲唔吊,搞到臭名遠播,如果高永文又係渾渾噩噩,小心他朝君體也相同吖,叮!

第一手消息請下載on.cc東網iPhone/iPad/Android/Windows Phone Apps