潮語「偽娘」係出自日本動漫界,意思係一啲外表係女性,但實質係男性嘅人。當然,喺動漫話層面,用圖畫去表達就相當容易。但喺現實世界,亦有好多「偽娘」。

最近澳洲有單新聞,係關於一位已完成變性手術嘅人,向澳洲政府爭取第三性別。呢位澳洲人天生男兒身,後來做咗變性手術。但又發現女生呢個性別又唔足以形容自己嘅身心狀態,仲覺得人類唔一定男女兩性二元劃分,所以多年嚟一直爭取第三性別嘅法律地位。最後終於勝訴,法院准許佢填性別嘅時候可以填「不確定」。

第三性別又叫做「跨性別」,即係有啲人覺得個天可能出錯咗,明明係男兒身,但又點解有個女兒心?仲生得清秀可人?相反有啲女性,明明生理上係女,但偏偏思想行為同男人一樣?唔通個天都唔鍾意我?喺香港,終審法院幾年前判「變性人W」勝訴,即係佢可以結婚,所以近日立法會《2014婚姻(修訂)條例草案》委員會亦開始第一次會議,為變性人結婚展開立法程序。但係,呢樣咁有社會爭議嘅法例,一開始就有分歧,因為有委員偏向要100%做晒變性手術,先可以有機會結婚,但問題係其實有七成以上跨性別人士,係未完成手術。咁法例同政府又點幫到佢哋?難為一班「偽娘」,唔知幾時先可以得到社會嘅公平對待……

佢哋生得清麗可人,好多以女性打扮,唔講唔知佢哋係百分百嘅男人。有部分本身係異性戀者嘅男仔,亦會不自覺地愛上呢一類「偽娘」。誤以為「偽娘」係女生而中伏嘅個案亦都時有所聞。「偽娘」都有分唔同種類,一啲係天生男性但係後天一直以女兒心去生活,呢類係需要做變性手術去解決問題,佢哋平常亦以女性嘅打扮去生活,只係生理上仲「有啲嘢」喺身,以至法律上仍然係男性。有啲「偽娘」係純粹喜歡女性打扮,喺生理上同心理上依然係男性,呢類易服「偽娘」亦未必全部係同性戀者,有啲仍然係異性戀或者雙性戀者。

「偽娘」雖然係「偽」,但絕對係「人」而唔係「妖」。所以,千祈唔好叫「偽娘」做人妖。大部分「偽娘」都係普通人一個,心地善良,渴望過正常生活。如果對於大陸嚟香港嘅人要包容,我寧願社會大眾去包容「偽娘」好過,起碼「偽娘」唔會搵個篋碌我隻腳!

第一手消息請下載on.cc東網iPhone/iPad/Android/Windows Phone Apps