政壇：搞搞政：頻外訪 燒公帑 吳得掂變「旅遊局長」
高官愛外遊，教育局近日向立法會財務委員會提交嘅文件顯示，教育局局長吳克儉（吳得掂）自前年十月上任以來，截至上月已經以局長名義外訪十三次，耗費公帑二百六十二萬元。上任只係一年半，佢嘅外訪開支、次數都遠超上手孫明揚五年任期總和，吳得掂真係名副其實嘅旅遊局長噃！
設計圖片及對白
據悉吳得掂前年甫上任，即要求下屬製造多啲外訪機會，最好「每月一外訪」添！而七除八扣所有年假、補假、公眾假期後，吳得掂十八個月外訪十三次，咁多次加埋嘅離港日數超過一個月，應該達標有餘。佢尋日出席財委會特別會議，就死撐外訪有一定作用同價值。不過，公幹之外，吳得掂不但逢請必到，知情人士仲爆料，話吳得掂早前一聽到有辦學團體率領學生飛赴印尼考察交流，原本只係一個學生研習分享會，點知佢二話不說即刻要求去埋一份，難為該辦學團體焗住「邀請」局長出席。
教育局嘅文件顯示，吳得掂的確曾經訪問過印尼，但係咪參加辦學團體嘅訪問團就唔清楚，外訪開支亦唔知係邊個找數。喺教育局工作上幾乎瓣瓣衰嘅吳得掂，依家再接連被踢爆涉嫌濫用公帑「遊埠」，唔通佢成日飛，搞到心都飛走埋？
