政壇：建制搞民調一鑊粥
港大民意研究計劃總監鍾庭耀早前被建制派批評，所做嘅民調係為反對派造勢，呼籲八大商會另設民調。呢件事搞唔搞得成仲未知，但港區省級政協委員聯誼會（聯誼會）就率先響應，委託一間中心做政改民意調查，尋日公布結果，點知搞到一鑊粥，連聯誼會本身都唔採用，真係唔搞好過搞。
呢間中心幫過九龍社團聯會進行有關立法會替補機制嘅民調，今次聯誼會就委託中心喺二月二十日至三月一日，透過電話隨機抽樣訪問咗二千八百幾名十八歲以上市民，點知有四成六人認為提名委員會（提委會）應該有一千八百至二千二百人，四成八人更認為特首候選人應該有五人或以上。不過，聯誼會向政府提交嘅方案，反而就建議將提委會擴大至一千六百人，候選人數目唔多過四個。
咁點樣自圓其說？九龍社團聯會理事長王惠貞就話，任何民主程序都要循序漸進，上次提委會由八百人加到一千二百人，一下子增加太多值得商榷，因為市民好自然認為愈多候選人愈好，但要考慮操作性喎。跟住有人質疑佢哋嘅問卷設計，包括點解四成一受訪者都係四十至五十九歲。
王惠貞就解釋，佢哋係隨機搵受訪者，之後表現得唔多想答，就咁結束記招。
