政壇：山姆大叔假關注氹番李漢奸民主阿婆
人稱「李漢奸」嘅民主黨創黨主席李柱銘同「民主阿婆」前政務司司長陳方安生，出訪美加「唱衰香港」之旅差唔多一個星期，終於獲「老朋友」、美國眾議院民主黨領袖佩洛西（Nancy Pelosi）接見，佩洛西仲向二人拍心口保證，美國國會好關注香港發展，包括「一國兩制」嘅落實同新聞自由面臨危機等議題。
佩洛西作為少數黨領袖，有冇能耐要求國會關注香港發展真係危危乎，但相信呢次接見已夠兩粒「舊電池」開心好多日。
此外，二人仲出席咗美國國會及行政部門中國問題委員會（CECC）圓桌會議，繼續就香港民主同新聞自由前景「告御狀」。委員會主席、參議員布朗（Sherrod Brown）話，委員會已將香港發展情況列為「優先關注事項」，會繼續監察同匯報喎。不過，講咗咁耐，老美除咗派出美國駐港總領事夏千福呢個「卒仔」唸口簧咁話支持香港落實普選之外，仲可以做啲咩呢？好心兩粒「舊電池」唔好再自欺欺人啦！
李漢奸同民主阿婆，緊接會喺當地時間星期五，「叩見」美國副國務卿勃恩斯同埋出席CECC聽證會，即管睇吓到時佢哋又點樣唱衰香港，又會得到老美邊方面嘅「承諾」喇。
