政壇：方剛訪滬探孫心切

立法會議員應中央邀請，下周五（十一號）晚赴上海三日兩夜傾政改。泛民扭擰一輪後，建制派議員都各有安排，由於抵達上海當晚並冇安排任何節目，部分建制派議員寧願唔跟大隊，改為翌日先出發，免得浪費時間喺上海過夜。但祖籍上海嘅批發及零售業界議員方剛就要提早當日下晝起飛，唔係佢好恨傾政改，而探孫心切咋！

方剛

「方」齡七十嘅方剛經已有三個乖孫，其中兩個內孫定居上海，所以當佢獲悉立法會有意組團赴上海，就二話不說即刻應承，仲安排早幾個鐘出發，就係為咗抽時間探乖孫。不過，方剛唔會離開大隊返自己屋企住，話始終傾政改要緊，探孫只係順路啫！

提起孫仔，方剛仲透露內孫鍾情消防車，所以早前就趁孫仔來港，特別帶佢去尖沙咀消防局開放日「朝聖」。在場嘅油尖旺區議會主席鍾港武，見到方剛光臨，想話安排佢坐貴賓席。不過，抱住個孫嘅方剛一於少理，表明以普通爺爺嘅身份參觀消防局，謝絕貴賓式招待，真係廿四孝爺爺。