十七名泛民主派人士嘅「絕食爭普選」行動,尋日踏入第八日,十七人當中剩番工黨林祖明、郭紹傑、白鴿黨胡志偉及尹兆堅四人繼續絕食,其他人已相繼結束。行動本來就係表態騷,但白鴿黨總幹事林卓廷(阿廷)尋日解釋佢要提早結束時透露,前晚護士幫佢做例行檢查時,知道佢因為腹瀉唔可以再飲葡萄糖水,血糖會隨時急跌,又話體形高大嘅人體力消耗量大,唔可以長時間唔食嘢,反而身形矮細嘅人可以絕食得耐啲喎。咁,點解該黨身形偏矮嘅前主席何俊仁(AV仁)同李永達(高達)咁快就要停止絕食呢?

設計圖片及對白

絕食效果不如預期,依家仲鬧出自打嘴巴嘅鬧劇,市民真係唔知信邊個喇。不過,就睇身形,阿廷真係高大過AV仁同高達好多,照護士嘅解釋,高達佢哋應該絕食耐力更好先啱。點都好,呢場絕食騷已近水尾,十三人結束後,只剩四人堅持。

阿廷話,佢會返屋企同家人共進晚餐食白粥,至尋晚七時,佢已經有成一百七十三個鐘未食過嘢,佢話原本都想堅持落去,但護士同佢講,因為佢一飲葡萄糖水就會肚瀉,代表佢嘅身體已經開始頂唔順,又話佢嘅血糖隨時都會大上大落非常危險,叫佢去到邊都要搵人陪,如果唔係分分鐘暈低都冇人知。絕食多日,佢開始覺得頭暈暈、有啲虛弱。佢話喺滙豐絕食咁多日,太太就擔心足咁多日,搞到佢非常歉疚,於是決定停止絕食,返屋企見吓啲屋企人。

胡志偉拜完山再繼續

堅守落去嘅胡志偉就話,幾日唔食嘢都唔係太辛苦,又話只要覺得自己身體可以支持落去,一日都唔會停止絕食。雖然絕食者唔可以做啲過於激烈嘅運動,但胡志偉今日會如常落區同去拜山,皆因外母落咗最高指令,話清明一定去拜山,所以今日佢就算幾咁唔舒服,都要乖乖地去拜山,之後再返滙豐繼續絕食咁話。

第一手消息請下載on.cc東網iPhone/iPad/Android/Windows Phone Apps