情人鎖成新景點 捉到鹿要識脫角
有首情歌係咁唱嘅：「有人告訴我，愛情像一把鎖。……自從遇見你，愛情鎖住了我……」愛情嘅魔力係咪真係可以將一對男女嘅心鎖住呢？答案留番各位自己追尋，太一叮今日想講嘅係，風靡好多國家及地區嘅情人鎖熱潮，已經悄悄吹到香港，仲鎖住唔少情侶添。
呢，大埔吐露港單車徑一段鐵絲網圍欄唔知幾時變成情人鎖景點，簡陋嘅圍欄上密密麻麻掛住寫有情侶名字、心形圖案及紀念日期嘅扣鎖，已經累積到二百個之多，遠遠望去就好似一幅真誠純潔嘅心牆，縱橫交錯扣住一個個山盟海誓嘅愛情故事，真係好浪漫。
正所謂，情若無花不上鎖。情人鎖景點一傳開，吸引唔少癡男怨女慕名而來，有人喺社交網站上載相片分享浪漫，亦有人希望同愛侶前往留下愛情見證，一時間眾口相傳，成為石屎森林中嘅一道浪漫人文風景線。當然啦，愛情對某啲人嚟講係甜酒，對某啲人嚟講係苦果，情人鎖亦係一樣嘅咋，對情侶而言係美事，對官僚而言係煩惱，由於情人鎖圍欄所在地段屬政府土地，相關部門話正在研究對策處理，唔知點樣處理喎。
其實仲使乜研究吖，難得情人鎖咁受歡迎，一於因利乘便打造成旅遊景點喇。喺外國，情人鎖許願地成為旅遊熱點嘅例子可以講多不勝數，最著名嘅就有巴黎藝術橋、南韓首爾塔、羅馬米爾維奧橋等等，每年都吸引大批遊客慕名而至。其中首爾塔情人鎖小廣場更加因為韓劇《來自星星的你》而爆紅，被旅行社列為必到觀光景點添，如果港產官僚咁都唔識得好好利用，咁就真係來自星星嘞。
咁講喇，情人鎖魅力沒法擋，鎖住嘅唔止係熱戀中男女嘅心，仲有世界各地遊客嘅心，港府如果能夠打造情人鎖景點，既浪漫，又有人情味，仲可以吸引各地遊客添，一舉多得，何樂而不為呢？自己知自己事，香港旅遊景點嚟嚟去去得嗰幾個，家陣難得出現一個「扣」人心弦嘅浪漫新景點，無理由捉到鹿都唔識脫角啫，吓話？
退一步講吖，市民扣情人鎖，無非都係想取其意頭，鎖住愛情，鎖住幸福，鎖住情人嘅心，如果當局鐵腕剪鎖，棒打鴛鴦，搞到有人情海翻波咯喎，唯你哋是問。
一句講晒，做情人要扣緊愛侶嘅心，做官就要扣緊時代脈搏，與時並進。施政必須以民為本，從利民角度出發，咁至可以贏得民心，否則，只能自取其辱嘅咋，叮！
