老牌華資銀行永亨賣盤,經幾個月拉鋸終進入最後直路,馮氏家族持有百分之四十四點七九股權,可以袋番九十四億元,原來佢哋仲有一批認股權,尋日公司話佢哋行使咗呢個交易,又可以袋多幾千萬,相對九十四億元,零頭嚟啫。

永亨賣盤,馮鈺斌進帳唔少。(資料圖片)

尋日永亨宣布,就先前授出嘅認股權發約七十萬股新股,其中馮鈺斌獲得約十六萬七千股,馮鈺聲獲約十一萬三千股,另外執行董事王家華獲約十二萬股。呢七十萬股新股當中,二十六萬股發行價為四十七點五元,二十萬股係四十六點九元,其餘發行價為一元,即係話相對尋日收市價,折讓百分之六十一到百分之九十九。粗略估算,馮氏兄弟合共有約二十八萬股,如果用尋日個價沽出,套現三千六百幾萬元,但唔知馮氏兄弟嘅認股權,行使價究竟係平嗰批,定係冇咁平嗰批,暫時唔知帳面賺幾多。

不過,馮氏兄弟未必會即刻喺市場賣出呢批股份,可能直接等華僑銀行收購,一個唔覺意,單刁六月之後至完成,仲可以袋多每股零點四六元嘅中期息。

第一手消息請下載on.cc東網iPhone/iPad/Android/Windows Phone Apps