城中鏡：女太空人怕輻射禁用手機合照
早前去咗港區婦聯代表聯誼會舉辦嘅「國際婦女高峰論壇」，而喺晚宴期間，見一眾姊妹湧埋去同一位女士影相，細心一望，原來係去年六月完成神舟十號與天宮一號對接的飛行任務、有「神女二號」稱號嘅中國第二位女太空人王亞平。當大家拿起智能手機打算同偶像合照時，主持人就不停提醒大家只准用相機，禁用手機，搞到粉絲們惟有搵大會攝影師幫手。點解呢？
王亞平（右）應王楊志紅（左）邀請，來港分享航天訓練嘅艱辛。（受訪者提供）
孔美琪（左）同陳肇始（右）拍住為提高母乳餵哺率而努力。
潘潔卸任後盡情旅行同休息，閒時寫作，睇嚟精神唔錯。
邀請王亞平來港嘅港區婦聯會長「紅姐」王楊志紅解畫，話咁做係為咗保護王亞平嘅身體，事關航天員團隊醫生交代話，王亞平升空後身體承受咗大量輻射及壓力，三年內都要特別觀察及照顧身體，難怪當晚佢好似國寶咁被呵護嘞。王亞平喺論壇上分享參加航天訓練嘅艱辛，全靠使命感及責任感支持佢完成重任，紅姐聽完好感動，打算再搵佢來港同學生分享喎！
潘潔寫書探討中國環境問題
當晚仲見到食物及衞生局副局長Sophia陳肇始，同維多利亞教育機構總校長Maggie孔美琪雞啄唔斷，原來食衞局成立咗一個委員會推廣母乳餵哺，Maggie都係成員之一。Sophia話香港媽媽喺BB初生時嘅哺乳率高達八成，但返工後就急跌至一成九，佢希望諗吓計喚起社會關注。
Maggie就話，若要推廣母乳餵哺，僱主嘅支持好重要，佢又提到香港產假只得十星期，比較新加坡嘅十六星期、韓國嘅十二星期少，所以應該立例延長假期以鼓勵生育。環境局前副局長潘潔亦罕有現身，佢話最近寫咗本關於中國環境問題嘅書籍，希望當政者搵對策改善環境問題喎！
