「少膽虫,你同我死過嚟!呢幾個新聞劇本一啲火花都冇,《爛果》點賣紙?你係咪想壹全霉快啲死?」向來得過且過嘅淫賤黎突然講呢啲,真係令本虫非常詫異。「我同你講過幾多次,請人一定要落足心機,為公司擦出新火花,唔好阿豬阿狗嚟見工都請,你當呢度善堂咩?即刻同我大換血!」

火花火花,你壹全霉個名臭成咁,有人肯嚟做都執到啦,仲多多要求?不過腦細出到聲,我惟有做應聲虫啦:「係係係係係,即刻大換血!但係請教吓腦細,點樣請人先可以確保佢擦得出火花?」淫賤黎一翻開報紙道:「你睇呢個荷蘭約會真人騷,參加者剝光豬尋真愛,男男女女赤條條咁,實有火花!下次有人嚟見工,就等我剝光豬負責面試啦!」活喺幻想嘅淫賤黎流晒口水,本虫真係冇佢咁好氣,趁佢魂遊太虛之際,悄悄退出房間歎茶去。

第一手消息請下載on.cc東網iPhone/iPad/Android/Windows Phone Apps