人口老化問題愈嚟愈嚴重，連帶政府部門都出現青黃不接、難請人嘅問題。公務員事務局局長鄧國威尋日就推出延長公務員退休年齡嘅諮詢文件，拋出四個方案，希望可紓緩眼前嘅問題，亦都順應國際大趨勢。不過，有公務員團體憂慮喺審核延遲退休嘅申請過程，會造成「馬房」文化，而且建議亦令公積金大幅飆升，加重庫房負擔，鄧國威應該及早諗計解決至得，唔好開咗個好頭，衰收尾。
鄧國威
