有消息話，上屆當選為立法會超級區議員嘅工聯會榮譽會長陳婉嫻唔係太想競逐連任，但又青黃不接、後繼無人，佢哋到依家仲未知最後係咪要佢再多選一屆。不過，聽聞佢哋內部就有人提議，可以畀港島區直選議員「阿王」王國興同九龍東直選嘅ＫＫ黃國健試吓接棒，但可惜兩人各有好壞，要雕琢吓先成大器。

先講阿王，佢最初以勞工界功能界別進身立會，之後再轉戰直選，成功喺新界西當選，今屆更轉去港島區開荒又成功奪得議席，為工聯會開創神話。但據聞佢喺工聯會內部講明做埋今屆就退休，但元老就提出要佢開拓埋九龍西。有人認為咁樣對阿王實在太苛刻，所以建議佢代嫻姐出選超級議席。不過，翻查前年立會選舉紀錄，阿王又未能好似嫻姐咁開拓到工聯會支持者以外嘅票源，即係話阿王有知名度係唔夠嘅。

至於KK又點呢？工聯會中人透露，原來有唔少街外人都叫錯KK做阿王，皆因佢哋個名有啲似喎，最搞笑嘅一次，就係當KK去支持某一建制派候選人參與區議會補選時，遇到「調理農務蘭花系」支持者叫罵，佢哋仲不斷用粗言去鬧KK，點知呢班人竟然係指住KK鬧「王國興」，搞到KK要澄清自己個名。如果工聯會要派阿王同KK出選超級區議會，就要幫阿王開拓票源，幫KK提高知名度嘞！

第一手消息請下載on.cc東網iPhone/iPad/Android/Windows Phone Apps