政壇：惜食半蚊雞行善撐社企
稻香嘅「壹蚊雞」好受歡迎，舊年就有唔少網民上載相片話挑戰食雞大賽，鬥食得多雞，行政總裁Eric梁耀進坦言，舊年反應超乎想像，令內地嘅自家雞場都斷晒市，按年賣多三成添。不過，佢話有唔少人淨係食雞髀、雞翼，其他部分唔要，好嘥！所以今年雖然依然畀食客任叫，但係就推廣「惜食」文化，加強「半蚊雞」優惠，即係畀五毫子食半隻雞，仲同社會企業惜食堂合作，如果埋單計，每人平均食半隻雞，稻香就會捐一蚊畀惜食堂。
「壹蚊雞」曾經同光大銀行、秋官（鄭少秋）並列為「跌市明燈」，但係睇番「壹蚊雞」自上星期五推出，期間港股不跌反升，睇嚟「壹蚊雞」可以除名喇喎！
近年餐飲業請人好難，尤其係洗碗、傳菜等基層工作，Eric話稻香就好重視員工，愈低層加得愈多人工，整體人工加幅係百分之三點四至三點五，但係洗碗、傳菜加足一成，侍應亦加百分之五，聽講洗碗由七千蚊加到萬一蚊喇，但缺人情況仍然冇乜改善。
