政壇：許智峰又同保安衝突
早前都講過，中西區區議員許智峰不滿區議會撥款二十五萬元予地區團體推廣《基本法》，質疑建制派借撥款利益輸送。呢件事已擾攘咗一段時間，而民政事務局局長曾德成已經澄清過，但許智峰仍未肯收貨，呢幾日除咗喺區議會靜坐，尋日仲無啦啦想闖入中西區民政事務處，最終同幾個保安爆發衝突，大家都報稱受傷送院。其實佢有冇反省過，點解抗爭咁耐，都似乎冇乜市民支持佢呢？
許智峰（中）尋日闖入中西區民政事務處期間，同保安員衝突而受傷。（受訪者提供）
話說許智峰不滿區議會用電郵傳閱方式審議撥款過程，所以佢尋日下晝三點幾鐘，諗住入去民政事務處搵民政事務專員理論，保安當然阻止佢啦，仲落埋閘防止佢亂衝，喺混亂期間，佢右手同右腳被閘夾傷，最終要送瑪麗醫院治理。現場消息話，除咗佢之外，其實仲有兩個保安報稱受傷送院，由於現場太混亂，都好難講邊個唔啱在先。
搞到咁大鑊，許智峰晚上出院時好似成個人醒晒，話以後唔會再靜坐，反而會用法律同輿論形式逼政府讓步，甚至考慮入稟告警方喎。其實佢諗通晒咪好囉，如果佢覺得自己有理據咪搵途徑去投訴囉。民政事務總署發表聲明，話中西區區議會已按程序處理有關撥款事宜，政府尊重區議會決定。警方表示，案件列為聲稱襲擊案，由中區警區重案組接手，暫無人被捕。
