南區區議會海怡西選區補選上月底落幕,新民黨派出政壇新丁Judy陳家珮成功擊退白鴿黨「老鴿」單仲偕,實力不容小覷。不過,Judy「升呢」成為區議員唔夠兩星期,就被記者撞到佢喺中環ifc商場「濕平」,唔通區議會事務冇嘢忙?佢連聲否認,話依家幾乎日日都開會,只係趁空檔出嚟食個晏,跟住仲向記者分享選舉期間嘅「洗樓」秘笈添!

陳家珮自爆為咗選舉激瘦七、八磅,但佢反而希望磅數唔會反彈。

Judy坦言自己始終係選舉初哥,落區拉票期間遇過唔少「奇難雜症」,好似有一日孖住黨主席葉劉淑儀到區內茶樓「洗樓」,大部分居民都畀面禮貌回應,唯獨有枱茶客發難向佢爆粗,佢當堂被嚇到不知所措,仲諗住硬着頭皮繼續向對方拉票。不過,當時葉劉一手拉走佢,事後仲教精佢遇着呢類場面,最緊要保持笑容同講「多謝」,無謂同呢啲人理論喎。

葉劉經歷過立法會選舉洗禮果然脫胎換骨,臨走前仲專登返去嗰枱茶客講聲拜拜,認真襟撈。另外,仲發現Judy選舉後瘦咗成個碼,原來佢為咗選舉日夜奔走瘦咗七、八磅,但佢似乎好開心,希望磅數唔會反彈咁話。

第一手消息請下載on.cc東網iPhone/iPad/Android/Windows Phone Apps