立法會將喺本月中審議撥款條例草案,繼人民力量「大舊」陳偉業同「慢必」陳志全向秘書處提交二百六十一項修訂後,社民連「長毛」梁國雄亦計劃提出四百項修訂,聲言今年「拉布」目的同往年一樣,都係想逼政府推行全民退休保障,又話台灣學生用佔領立法院違法方式反對服貿,佢哋就用「拉布」合法佔領立會時間,又話既然泛民主派支持台灣學生嘅不合法佔領行動,就應該支持佢哋拉布喎!

白鴿公文袋唔撐拉布

雖然財爺鬍鬚曾早前已喺網誌提早大叫「狼來了」,話臨時撥款只夠應付未來兩個月開支,要求立會盡快通過預算案審議程序,否則政府就會陷入「乾塘」地步。人民力量再以「回水一萬」作為今年拉布嘅主題,修正案內容包括削減特首辦開支、問責官員同行政會議成員薪酬。大舊話政府一日唔承諾向市民派錢,佢哋就會不斷「拉布」,預計預算案最早都要辯論到五月中先可表決。

對於議事規則委員會日前舉行會議,會上未能就「剪布」問題達成共識,意味主席曾鈺成今次要再用《議事規則》第九十二條「剪布」。大舊就反駁,話審議預算案撞正復活節假期,開會時間比往年少一截,如果主席再用已經有足夠時間審議為由強行「剪布」,佢哋一定會考慮用司法覆核嚟挑戰主席嘅決定。

慢必都話雖然今年嘅修正案數目較舊年少,但由於修訂項目涉及唔同範疇,相信主席唔可以再用「瑣碎無聊」為由拒絕佢哋嘅修訂。不過,白鴿黨同公文袋表明唔支持今次「拉布」,建制派亦強烈譴責「拉布」行為,批評個別議員為打擊政府威信,不惜阻撓立會解決民生問題。截至昨日,秘書處暫時收到五位議員提出合共三百八十六項修訂,提出修訂嘅截止期限為下周一午夜。

第一手消息請下載on.cc東網iPhone/iPad/Android/Windows Phone Apps