議員提問多廢話 立法會淪垃圾會

嗱，唔係太一叮亂噏o架。每年財政預算案公布後，立法會議員都會就預算案內容向政府部門提問，近年問題愈提愈多，今年甚至多達六千八百幾條添，平均一個人問近百條問題，破晒紀錄。即係咁，議員勇於提問，有助市民監督政府，亦有助政府查找不足，本來係好事，可惜有啲議員唔知係咪無聊過頭，問題唔止離題萬丈，而且千奇百怪，要幾廢有幾廢。

好似嗰位問康文署新種植物存活率有幾高嘅議員咁吖，真係令人Ｏ晒嘴，事關植物存活率高低主要受環境及氣候等因素影響，植物學家一時三刻都未必可以準確回答喇，何況係政府；又好似有議員問全港公園水池到底有幾多隻龜，莫講話政府唔識答，就算答得出都冇意義喇；最騎呢嘅係，有議員連UFO都提問，難得政府部門好認真咁回答，話過去本港最多市民發現UFO係大埔區，總共有二十五宗報告，其次係元朗同灣仔，分別有十三宗同十二宗喎。你話嘞，呢啲問題究竟同預算案有乜關係呢？莫非近期有套講外星人嘅韓劇大熱，議員睇到上晒腦，擔心外星人降落地球？

老實講吖，家陣香港經濟低迷，民生凋敝，深層次矛盾一大堆，如果議員真係咁得閒咁無聊，不如討論吓點樣搞好經濟民生仲好喇。

所以話啫，立法會被人揶揄為垃圾會，唔係無理由o架。有啲議員不務正業，一味做騷，搞到議事堂烏煙瘴氣，七國咁亂，有人開會搵周公、有人開會玩失蹤、有人爆粗掟嘢、有人掛住睇艷照，有幾多個真心服務市民吖。最好笑嘅係，由於近期樓市轉趨淡靜，港府擱置「港人港地」政策，有議員竟然話咁做會令自由市場運作變成人為政策運作，違反市場經濟原則喎。其實，行政干預本來就唔符合自由市場原則，政府停止干預，正正係回復市場運作，議員咁都可以掉轉嚟質疑，講得好聽啲叫做無知，講得難聽啲根本就係白癡。

其身不正，何以正人，議員不學無術，咁嘅水平點樣為民喉舌，又點樣監督政府吖，唔怪得佢哋嘅民望仲低過政府官員喇。計太一叮話齋，選民真係要帶眼識人，唔好畀嗰啲濫竽充數嘅政客搞亂立法會，搞亂香港吖！