SUN搞作：打橫嚟講：香港政改傾半日，夠啦！

好嘞！喺一個鬼域裏，究竟，「半日」的定義，係點嘅先？

嗱！小學常識話：地球的一日，係二十四小時嘅！咁！「半日」，即係十二小時也！對嗎？

有商有量的傾十二小時，夠了吧！泛民朋友！

但係，小學課本又有說，一天是異分「日」與「夜」的，即日夜各佔十二小時也！那麼，「半日」，咪係十二除以二：六個鐘頭囉！

歷來，偉大祖國的領導與番邦元首會面，即使係美國總統，討論全球大鑊嘢，也只不過兩粒鐘內完事；家陣，閒聊一個再不會生金蛋的貧困小特區，花費六個鐘，畀足面矣！

喂、喂、喂！講清楚先，「半日」又不一定係「六小時」的，因大家講緊係「辦公事」嘛！以一日正常的辦公時間「朝九晚五」計，即八個鐘。「半日」囉喎！便係四粒鐘囉！

吓！嫌少？大家不要忘記，《基本法》的立法原意，係「一國」大過「兩制」。「一國」講乜，「兩制」就要聽乜。一班微臣奴才嚟接聖旨之嘛！四粒鐘，足夠做「回歸Hand-Over典禮」三次矣！當年的「移交大龍鳳」都只係粒來鐘咋！你班友咪咁貪心至得o架！

嗱！曾鈺成主席話過中國領導人「見客」安排是從不設時限的，這是「特色」，也是「國情」，咁又係喎！千祈不能話佢哋無規無矩呀！這幾千年來，中國人的特性：「酒逢知己千杯少，話不投機半句多！」若啱傾的話，留你哋過夜又點話！人治世界，就係咁o架啦！

彭志銘

次文化考古學家，對城中潮語有深入研究，博徵博引，廢官廢人行埋一邊。

歡迎add我facebook一齊(目及)實政府