SUN搞作:SUN官場現形記:事出有因
食環署被市民投訴最多,雖然經調查後證實投訴成立或部分成立的比率唔算太高,但李衞仍決定去了解了解。
李衞︰咁多投訴,你哋係咪要反省一下?
官員︰香港出名投訴之都,啲人小小事都投訴一餐。
李衞︰置之不理,總有一日會出事。
官員︰其實,我哋有意見箱,有嘢可以經意見箱同我哋反映。
李衞︰等等,等我丟咗垃圾再講。
(李衞上前丟垃圾)
官員︰先生,你亂丟垃圾,要罰你千五蚊!
李衞︰我邊有?我明明丟入廢紙箱,你睇個廢紙箱仲塞到爆晒。
官員︰嗰個邊係廢紙箱,係我哋嘅意見箱。
李衞︰原來如此,意見堆積如山都唔處理,唔怪得咁多投訴喇……