政壇：「大嘥鬼」燒錢近1400萬
環保係大趨勢，針對港人過去濫食嘅大嘥情況，政府去年五月推行「惜食香港運動」，仲製作咗個眼闊肚窄嘅「大嘥鬼」卡通人物打頭陣，一年過去，成效點呢？環境局尋日未能提供去年廚餘數據，立法會議員郭偉強話，減廢運動未知成效，但過去八個月已燒錢近一千四百萬元，當中七成半開支用於宣傳廣告，未來一年嘅預算又近一千六百萬元，憂慮巨額公帑未能用得其所。
眼闊肚窄嘅「大嘥鬼」成為惜食宣傳嘅主角。（資料圖片）
環境局局長黃錦星死撐，指雖然無法量化惜食運動嘅減廢成效，但有酒店嘅廚餘量已成功減少逾一成，佢仲話，眼闊肚窄嘅「大嘥鬼」深入民心，依家連小朋友都知道「唔好嘥嘢」，可見活動嘅滲透率高喎。其實，運動進行咗近一年，環境局即使無法統計一年嘅數據，都應該蒐集半年數據，咁樣就唔使估估吓、得把口喇。
