政壇：鄭經翰嗌封咪似為撲水

鄭經翰尋日中午喺節目一開始時話，自己早前出席另一電台節目做嘉賓，諗起自己當年受襲，覺得非常感觸，最近又有前電台節目主持人李慧玲被解僱、《明報》前總編輯劉進圖遇襲等事件，形容十年過去後大家仍然唔警覺，當年更有人幸災樂禍，覺得佢被襲係因為個人問題，令佢意興闌珊咁話喎。

講「封咪」好似理由多多，但佢講多陣就自動波提到網台嘅財政狀況，自言雖然網台開支微不足道，但以佢哋目前約五十萬聽眾之中，只有唔夠百分之三嘅人付費支持，實在唔足以維持網台營運。鄭其後更宣布由本月十五日起，喺網站重溫同下載節目需要收費，而手機應用程式亦會稍後跟隨，如果五月份收入仍未達標，更會考慮將某些節目改喺非免費頻道廣播，難怪有人笑言種種迹象顯示，佢講「封咪」係配角，講莫財先至係主角。