政壇：梁美芬激戰慢必
香港爭拗多，淨係圍繞跨性別人士嘅問題就可以拗餐飽。尋日立法會財務委員會特別會議審議財政預算案有關政制及內地事務局嘅開支預算，承認出櫃、並積極爭取跨性別人士平權嘅議員陳志全（慢必）就緊抓佢關心嘅議題發問，一時質疑性小眾歧視嘅研究費低，一時質疑基督教學校涉嫌禁止教師為跨性別人士，政制及內地事務局局長譚志源答得輕描淡寫，反而早前反對立法保障跨性別人士嘅議員梁美芬就挺身激辯，又對消除歧視性小眾諮詢小組嘅意見一面倒表不滿，直言沮喪，仲話想退出諮詢小組添。
設計圖片及對白
研究纏擾法多40萬元
慢必尋日質詢政府，點解用八十五萬元作研究纏擾法嘅顧問費，但對香港性小眾歧視嘅研究就只用約四十五萬元，言下之意係厚此薄彼？跟住佢又不滿今年初有基督教學校涉嫌禁止教師為跨性別人士，要求該教師簽署內容包括不可違反同性戀或一男一女婚姻行為嘅聲明，質疑學校係咪都要遵守《消除性傾向歧視僱傭實務守則》。譚志源回應時好淡定，呼籲各界遵守有關守則，至於政府大部分研究項目，其實係由招標決定嘅。
梁美芬稍後發言，就不點名對慢必提及嘅學校問題連珠炮發，佢話間學校講明係基督教學校，梗係對教師嘅道德標準有要求啦，希望教師同學校辦學理念一致，質疑有人不斷寫信去投訴學校，其實係製造白色恐怖喎，又話未立法已經係咁，立咗法之後都唔知點算。言論同立場明顯同慢必打對台。
梁美芬跟住仲將話題扯到去政府研究消除歧視性小眾嘅諮詢小組，佢話真係好沮喪，唔明白點解個小組已有既定立場，又支持浪費公帑去賣完廣告先做民調，所以自己都唔知究竟係咪應該繼續坐喺諮詢小組入面喎。
