電話亭閒置阻街 懶官僚應被淘汰
太一叮睇過一套關於時空交錯嘅電影，男主角每晚風雨不改，走去街尾電話亭打電話畀身處青澀時代嘅舊女友，從而發展出一段詭異奇情嘅浪漫故事。唔使多介紹，故事背景梗係幾十年前嘅香港喇，今時今日手機普及，仲邊有人幫襯電話亭吖？難怪有人話，電話亭同初戀一樣，已經成為歷史一部分。
唔好誤會，太一叮今日唔係講愛情故事，亦唔係講通訊科技發展史，而係講一個關乎大家切身利益嘅問題，就係如何善用公眾空間。喂，既然電話亭已經變成古董，點解仲要一排一排擺喺街邊阻碇呢？唔通官老爺嫌香港未夠人多路窄？
現時全港有超過一千六百個公眾收費電話亭，不過使用率奇低，幾乎得個擺字。嗱，本報記者巡查咗多區電話亭嘅使用情況，其中尖沙咀碼頭共有六個，每三個一組，佔據大量路面；中環皇后像廣場外面更加多達二十個，平日連菲傭都唔幫襯，唔只淪為路邊擺設，更加變咗港府施政不合時宜嘅最佳註腳。
咁電話亭係咪完全無用呢？都唔係嘅，睇吓用嚟做乜囉。旺角及元朗街頭唔少電話亭變身私人貨倉，塞滿傳單、清潔用品、背囊及摺櫈等雜物，充分體現廢物利用嘅環保原則。至於其他地區電話亭，就算無畀人濫用，亦畀白鴿佔據，布滿鴿糞，異味撲鼻，成為公共衞生隱患。
電話亭阻街兼成衞生隱患，點解唔拆走呢？當局話，電話亭嘅數目及位置由營辦商決定喎。嗱，呢啲咪叫墨守成規，敷衍塞責囉！開講有話，法例係死嘅，人係生嘅，當局識唔識變通吖？更何況，所謂嘅法例已經係咸豐年代訂立，同現實情況完全脫晒節，咁樣施政管理，唔怪得香港樣樣都落後過人喇，叮！
咪話太一叮踢爆吖，電話亭閒置而無人處理，主要原因唔係法例落後，而係當局懶散啫。喺人手一機嘅時代，外國一樣面對公眾電話亭閒置問題，但係人家唔會翹埋雙手乜都唔做，反而諗計利用，化腐朽為神奇，好似內地有城市將電話亭改裝成手機或電動車充電站，英國及巴西將電話亭變為藝術品美化街道，法國北部則因應電話亭使用率低而陸續動工拆除。港產官僚乜都無做，關人個關，簡直就係一座人形電話亭，得個擺字。
時代車輪，滾滾向前，政府施政亦要與時並進，靈活變通。唔該港產官僚快快因應實際檢討全港電話亭嘅數目及位置，防止阻街及濫用，如果唔係，被時代淘汰嘅就唔止電話亭，仲有你哋吖，叮！
