城中鏡：鄧聲興長揸騰訊誓賺盡
「股王」騰訊近排股價chok爆，但都無影響到尚乘財富策劃證券業務部總經理Kenny鄧聲興呢位超級粉絲揸住騰訊六年，勁賺百萬元，雖然依家同高位都差成百蚊，不過佢無動搖過，一路持貨，仲教路話賺要賺到盡，長揸先賺到大錢！
鄧聲興話買咗騰訊六年，賺咗百萬元。（資料圖片）
騰訊股價坐火箭，Kenny就搭啱呢趟順風車，喺○八年用每股四十四蚊買咗幾千股，六年間就賺咗百萬，聽落好似好易，之但係四十四蚊買，翻一番升至一百蚊唔放，二百蚊唔沽，再到十倍四百四十蚊，你仲忍到唔放？忍耐力咁強，真係抵佢賺！Kenny話由買入一刻就諗住長揸，因為騰訊喺大陸互聯網獨大，用戶數目驚人，咁即係唔係符碌啦，但佢都好坦白講，因為係幾千股，貨值都係十萬八萬，若果係幾十萬，應該一早放咗喎！
股王歷史高位係六百四十六蚊，依家冇咗百元，Kenny話繼續長揸，無諗過沽，除非內地通訊平台開放畀第二個，無咗個壟斷性優勢啦。不過，佢又無再入貨，話除非股災令股價大跌啦，總之係非基本面因素，就會考慮再增加持股，但依家炒緊其他，唔得閒理佢着！
