城中鏡：女律師文舞全才
香港工商界婦女紀念「三八」國際婦女節籌備委員會日前舉行聯歡晚宴，香港女律師協會一眾靚靚成員嘅表演唱得又跳得，彰顯專業女性剛柔並重嘅一面。晚宴仲有同為律師嘅中華總商會永遠名譽會長蔡冠深太太蔡關穎琴表演耍大極，演出有板有眼。
劉佩琪（左起）、李婉、黃琦雅同趙文琪個個都係律師，但都唱得跳得。
蔡關穎琴十年前已經學過太極，今次表演當然難唔到佢。
源林潔和（左起）、蕭詠儀同史顏景蓮都深深明白同老公嘅相處之道。
排練近兩個月
繼去年表演《唐伯虎點秋香》之後，香港女律師協會嘅成員今年齊齊着上古裝，邊唱邊跳《皆大歡喜》，盡展女性嬌柔美態。有份演出嘅副會長趙文琪、成員劉佩琪同黃琦雅話，作為律師平日都好忙，但大家仍堅持抽時間排練歌舞實在非常難得。佢哋今次排練咗接近兩個月，所有排舞錄音等工作都係大家一手一腳包辦，真係擺少啲心力都唔得。
蔡關穎琴就話，雖然耍太極動作緩慢，但其實消耗好大體力，耍咗一陣就已經出晒汗嘞。日前佢為咗呢個表演練習咗五次之後，仲有朋友話佢瘦咗添，氹得佢好開心。
當晚活動仲有其他婦女界代表出席，好似香港中國婦女會主席蕭詠儀同會長源林潔和，身為專業女性，佢哋亦絕對唔會忽略家庭嘅重要性，仲同大家分享同老公相處之道。蕭詠儀話即使喺外面係個女強人都好，返到屋企對住丈夫就一定要體貼和互相尊重，而出到外面就要盡量唔好搶晒老公風頭，因為無論男女都一樣愛面子喎！
