政壇：搞搞政：克勤大舊石 亂問玩殘官員

好似地產及建造界議員「大舊石」石禮謙竟然問康文署新種植物「存活率」有幾高。聽到呢條問題，政府中人可能Ｏ晒嘴，因為每種植物都有唔同生命周期，開花結果、凋謝枯萎又係大自然定律，邊有得計算存活率呢？康文署惟有答佢植物存活受多種環境、氣候因素影響，所以署方並冇制訂「存活率」指標。

向來關注小動物權益嘅新界東直選議員陳克勤，就問康文署有冇統計過署方轄下公園水池到底有幾多隻龜，同埋啲龜有幾多隻係被放生或遺棄。康文署真係冇佢咁好氣，老實唔客氣話政府所有公園水池根本冇養龜，只係市民遺棄啲龜喺水池，所以署方冇相關統計數字。面對呢類咁騎呢嘅問題，唔知康文署署長馮程淑儀好嬲定好笑呢？

至於體育、演藝及文化出版界議員馬逢國，就問公共圖書館過去一年買咩書籍最多。結果都幾令人意外，估唔到中文成人書籍除咗考評局出版嘅文憑試「雞精書」外，第二位就係亦舒寫嘅《紅杏與牆》，一共買咗二百零四本，唔知康文署覺得呢本書有乜過人之處呢？