立法會每隔幾個月都會宴請各國駐港總領事，唔少議員亦畀面出席趁機「勾結」外國勢力。不過，尋日有議員因為領事一個疑惑而爭論，令午宴火藥味甚濃，但「罪魁禍首」、舊年被踢爆月租七十二萬元超級豪宅嘅英國駐港總領事吳若蘭（Caroline Wilson）就死撐唔出聲，寧願做隻塘邊鶴睇戲，為呢場午宴火上加油。

話說阿根廷總領事對立法會仍存在功能界別相當好奇，同枱飲食界議員張宇人當然盡地主之誼，引用數據硬銷呢個制度適合香港，呼籲其他國家多多學習添！一直爭取取消功能界別嘅陳偉業當然唔忿氣反駁啦，搞到餐飯出現燶味。

其實功能界別都係拜港英殖民地政府所賜，唔係港英政府八十年代立法，引入第一批功能界別議員，香港唔會存在功能界別。據聞同枱嘅吳若蘭續貫徹來港後封口政策，全程唔出聲，莫非佢驚喺呢個政改諮詢敏感時刻講多錯多？

第一手消息請下載on.cc東網iPhone/iPad/Android/Windows Phone Apps